Сандықтау ауданынан құнды жәдігерлер табылды
TКеше
Сандықтау ауданынан құнды жәдігерлер табылды
Археологиялық экспедиция мүшелері жақында Ақмола облысының Сандықтау өңіріндегі Сарқырама өзенінің жағасындағы қорымдардың бірінен әйел адамның мүрдесін тапты. Бұл туралы "Мәдениет" телеарнасы хабарлады.
Біздің дәуірімізге дейінгі 8 мың жыл бұрын өмір сүрген тайпаларды ғалымдар Петров дәуіріне жатқызып отыр.
Әйел адамның қолында болған білезік, бойтұмарлар мен аяғына тағылған әшекейлері қоладан жасалған. Аздап бұзылғаны болмаса, білезіктер шірімеген. Сондай-ақ, ине, пышақ, шеге сияқты заттардың да сынған қалдықтары бар. Сүйектен жасалған алқалар да сол қалпында сақталған.
Мұрат Жақыпбекұлы, Ақмола облысы тарихи-өлкетану мұражайының ғылыми қызметкері:
Бұл алқаларды аң стилінде жасаған. Грефоның тырнағынан немесе жыртқыш аңдардың тістерін алып мойындарына іліп алған.
Ал мына заттарды археологтар тігінші құралы оймақ және оттық болуы мүмкін деп топшылауда. Бұл жәдігерлердің қола дәуірінен жеткенін түсіне қарап ажыратуға болады, дейді олар. Қыш құмыралар мен ас үйге қажетті ыдыс-аяқтардың 10-ы осы Сандықтау өңіріндегі Жабай және Сарқырама өзендерінің бойынан табылған.
Талғат Ыбыраев, Тарихи-мәдени мұраны қорғау және пайдалану орталығының директоры:
Жалпы, Сандықтау ауданы бойынша 87 ескерткіш табылды. Соның бәрін біз тізімге кіргізіп, қорғау керектігі турасында бүкіл жергілікті комитеттерге хат жіберілген, енді ол жерлер ешкімге берілмейді.Ол енді мемлекеттің қорғауында болады.
Сандықтау ауданы бойынша әлі де болса зерттелмей жатқан қорымдар мен қорықтар көп. Көпшілігі тың игеру жылдары жермен жексен етілсе, енді бір бөлігі өзен суына шайылып, мал тұяғының астына тапталған.