Саяси террор жасатқандар кім?

Саяси террор жасатқандар билiк басында ұзақ жүрмес

11 АҚПАН – ҰЛТТЫҚ ҚАСIРЕТ КҮНI

11 ақпанда мемлекет және қо­ғам қайрат­керi Алтынбек Сәрсенбайұлы мен оның серiктерi Бауыржан Байбосын және Василий Журавлевке қастандық жасалғанына тоғыз жыл толады. Бұл қанқұйлы қылмысқа шынайы баға берiлген жоқ әлi. Өйткенi тапсырыс берушi бас қылмыскер жазасын алған жоқ. Мұның саяси террор екенi басы ашық жайт. А.Сәрсенбай­ұлына атылған үш оқ – Қазақ елiнiң болашағына, тәуел­сiз­дiгiне, елдi­гi­не атылған оқ! Ендi осы үш оқ­тың саяси салмағын таразыға тартып көрейiкшi.
Сенат аппаратының жетекшiсi Ержан Өтембаев – балауыздан жасалған адам секiлдi. Неге? Оның болбыраған тұлғасынан қалаған адамды жасап шығаруға болады. “Мүсiншi” оны қалай созғылаймын десе де, өзi бiледi. Бiр сөзбен айтқанда, Өтембаев – мiнезi жұмсақ, солқылдақ жан. Талдықорғандағы сот бастала салып-ақ “мүсiн­шiлер” Өтембаевтан қанқұйлы қылмыскер, қанiшер жасап шығарғысы келдi. Алайда, олпы-солпы дүниенiң көзге көрiнiп тұратыны секiлдi жамап-жасқап жасаған қылмыстық iстерi ә дегеннен-ақ күйреп қалды. Судья Лұқ­пан Мерекенов Өтембаевты “үш адамды тапсырыспен өлтiрген қылмыскер” етiп сомдап шықты. Онысы олақ қыздың қолындағы кестедей күлдi­бадам бiрдеңе болды. Саяси тапсырыспен қылмыс жасау үшiн Өтембаев банктен 60 мың доллар несие алыпты-мыс. Осыдан-ақ байқалмай ма, бұлардың жүгi көш қозғалмай жатып ауып қалғанын.
Ал ендi Өтембаевтың үш адамды тапсырыспен өлтiрткiзуiне не себеп (мотив) болды? Себебiнiң түрiн қараңыз: Өтембаевтың араққа салынып кеткенiн А.Сәрсенбайұлы аты-жөнiн көрсетпей мақаласында жазған. Бұл жағдай Өтембаевтың намысына тиген де, бандит Ибрагимовтi жалдаған. “А.Сәрсенбаевты соққыға жық” деп. Ол Өтембаевқа бұлай ету қиын екенiн ескертiп, өлтiрудi ұсынған... Ақылға қонбайды. Ақ матаны қара жiппен көктеп тiккендей қисынсыздығы тағы көзге ұрып тұр.
Ендi бiр қисынсыздығын мынадан көремiз: жәбiр­ле­нушi Р.Сәрсенбайұлы Өтембаевтан: “Өзiңiз жайында жазылған мақалаға байланыс­ты бiреуден ақыл сұрадыңыз ба? Талқыладыңыз ба?” деп сұрады. Өтембаев “жоқ” деп жауап бердi. Ал ендi Өтембаевтың тiкелей бастығы – Сенаттың сол кездегi төрағасы Нұртай Әбiқаев бұл туралы былай дейдi: “Иә, менiң түсiнуiмше, Өтембаевтың iшiмдiкке жақындығы туралы БАҚ-та бiрнеше мақала шыққаннан кейiн ол маған келiп, ойын айтты. Мен оған пресса арқылы терiсте­ме берудi кеңес еттiм”.
Сонда кiм өтiрiк айтты? Өтембаев па, әлде Әбiқаев па? Мiнезi жұмсақ Өтем­баев бастығының айтқанын екi етпейдi. Әбiқаев былай iсте десе, артық-кемi жоқ дәл солай iстейтiнiне еш күмән жоқ. Ендеше, Әбiқаев өтiрiк айтқан боп тұр ғой...
Бұл iстегi тағы бiр аса маңызды нәрсе – Өтембаевтың өкiнiш хаты. Әлгi “өкiнiш хатқа қатысты” президент Нұрсұлтан Назарбаевтың өзi жұрт алдында ақталғанын қалай жоруға болады? Пре­зиденттiң өзiн бұлай етуге мәжбүр еткен не нәрсе? Мұны да iш сезетiндей...
Ендi бүгiн “тапсырыс берушi” Өтембаевтың орнына Рахат Әлиев пен Әлнұр Мұсаевты қойды. 2006 жылы күйеубаланың түкiрiгi жерге түспей тұрғанда жәбiрлену­шiлер оны сотқа шақыртуды талап еткен. Әлиевпен қоса, Д.Назарбаеваны, Н.Әбi­қа­ев­­ты, Ә.Мұсаевты, Н.Дүт­баевты, бұлардан өзге де бiрнеше адамды тергеудi сұрады. Судья Л.Мерекенов ат-тонын ала қашты. Бұлардың атын атаудан қорықты. Сөйткен Мерекенов бүгiнде әр-әр жерде сұхбат берiп, “Әлиевтiң қылмысының се­бебi – Қазақстан басшыларының беделiн түсiру, елде төңкерiс жасау жоспарының бiр бөлiгi” деп сайрап жүр. Мұндайда қазақ “бүйткен төрелiгiңе болайын!” дейдi.
Рахат Әлиев тапсырыс берген күннiң өзiнде күйеуi­нiң ойында не барын Дариға Назарбаева бiлмедi дегенге кiм сенедi? Егер бiле тұра “тәйт” демесе, оның қылмысы бұрынғы күйеуiнiң қылмысынан бiр мысқал да кем емес. Мұны да бiреу айтуы керек қой.
Бұл iстегi “жаңадан ашыл­ған мән-жайлар” – бандит Ибрагимовтың сөзi. Соның сөзiмен “балауыздан жасалған адамның” – Өтембаевтың жазасы жеңiлдеп, тапсырыс берушiден қылмысқа себепшiге айналып шыға келдi. Мерзiмiнен бұрын шарт­ты түрде босаған Өтем­баевтың қазiр қайда екенi белгiсiз. Рөлiн сәттi орындап шыққан ол теңiздiң жағасында күнге қыздырынып жатқан шығар, кiм бiледi. Бәлкiм...
Бұл қанқұйлы қылмысқа қатысты iстi әбден шатпақтаған адамдардың аты-жөнi айтылады әлi талай. Өтембаевқа намаз үйреткендей аузына сөз салған – сол кездегi бас прокурор Рашид Түсiпбеков пен iшкi iстер министрi Бауыржан Мұхамеджанов. Мұны Өтембаевтың өзi мойындаған. Осылардың қылмысын судья Лұқпан Мерекенов заңдастырып бердi. А.Сәрсенбайұлына жасалған қастандықтың саяси террор екенi бұларсыз-ақ белгiлi.
Бiрiншiден, мемлекет және қоғам қайраткерiне – беделдi саясаткерге қастандық жасалды.
Екiншiден, ресми айыптауға сүйенсек, бұл қылмыс­қа мемлекеттiк органдар – ҰҚК-нiң “Арыстан” арнайы жасағы мен Сенат аппаратының басшысы қатысты.
Үшiншiден, үш бiрдей адамды атып тастаған соң, денесiн тығып әуреленбеген. Яғни, қоғамды тiтiрету­дi, үрейлендiрудi, Қазақ қоғамын тарының қауызына сыйдыруды мақсат еткен.
Қылмыстық топ мақсатына жеттi: бүгiнгi билiктiң ең негiзгi қарсыласын – қылмыс­тық жүйенi түбiрiмен өзгертуге тырысқан саясаткердi серiктерiмен қоса жазым еттi.
Саяси элитаны үрей би­ле­дi. Бiрнеше адам саяси сахнадан кеттi. Саясатпен айналыссам деген жастардың да көбi райынан қайтты. Қансыраған оппозиция әлi оңала алмай жүр.
Қоғам шалажансар күй­де. Алтынбек Сәрсенбай­ұлының деңгейiндегi саясаткер қоғамның өз iшiнен шыққанша бiраз уақыт қажет.
А.Сәрсенбайұлы мен оның серiктерiне жасалған қастандықты “саяси террор” деп бағалауға осы себептер жеткiлiктi. Мұның саяси террор екенi, бұл iстiң Қазақ қоғамын бiрнеше жылға керi сүйреп тастағаны әлi-ақ ашық айтылады.
“Ақанның құлагерiне қас­тық қылған батыраштар мен қотыраштар тарихта қандай атпен қалды? Қанiшер, жа­уыз, екiжүздi сұмпайы деген атпен. Алтынбек Сәрсенбайұлына қастандық жасатқандардың да тарихтағы аты бiреу – батыраштар мен қотыраштар. Қастандықтың құпиясын уақыт ашады” деп жазыппыз бұдан үш жыл бұрын. Онсыз да кешiгiп жү­ретiн шындықты ендi қанша күтерiмiз белгiсiз.
Жұрттың тағатсыздана күтетiнi – осы ақиқат. Саяси мақсатта қылмыс жасағандардың бойында үнемi үрей жүредi. Қашан әшкереленiп қаламыз, жазадан қалай құтыламыз деген ой олардың басқан iзiнен қалмайды. Ол түбiнде түрмеге, жеделдете көрге тықпай тынбайды. Алтынбектiң және оның қасындағы адамдардың өмi­­рiн қиғандар – халықтың қарғысына қалғандар...

erik_r@bk.ru
Ерiк РАХЫМ