ЕАЭО шеңберінде бірыңғай валюта енгізудің келешегі жоқ - ҰКП
Астана. 3 сәуір. Baq.kz - "Атамекен" Ұлттық кәсіпкерлер палатасы төрағасының орынбасары Рахым Ошақбаев Еуразиялық экономикалық одақ шеңберінде бірыңғай валюта енгізудің келешегі жоқ, - деп мәлімдеді. Бұл жөнінде tengrinews.kz хабарлайды.
Ұлттық палата өкілінің айтуынша, ЕАЭО құру жөніндегі келесімшартта бірыңғай валюта енгізу туралы қарастырылмаған. Ошақбаевтың сөзіне қарағанда, бірыңғай валютаға өтудің қысқа мерзімді және ұзақ мерзімді келешегі Қазақстанның экономикалық әлеуетін шығынға ұшыратады. "Мемлекет Басшысы нақты түсіндіріп берген болатын, - Еуразиялық экономикалық одақ - саяси емес экономикалық одақ. Сондықтан мен мұндай бастаманың қазір де, болашақта да ешқандай келешегі жоқ деп сенемін. Сонымен қатар, тағы бір айтарым, кейбір сарапшылар бірыңғай валюта - бірігудің жоғары дәрежесі, біз бірыңғай валютаға өтуге дайын емеспіз деп пайымдайды. Біз макроэкономикалық, ақша-несиелік және монетарлық саладағы өз саясатымызды үйлестіргеннен кейін ғана бірыңғай валютаны енгізу туралы айта аламыз. Мен бұған түбегейлі келіспеймін және Қазақстан қазір де, болашақта да Еуразиялық экономикалық одақ шеңберінде бірыңғай валютаны енгізбеуі керек деп ойлаймын", - деді Ошақбаев.
Естеріңізге сала кетейік, бұған дейін Ресей президенті Владимир Путин валюта одағын қалыптастыратын кез жетті деген пікірін білдірген болатын. Ол "Серіктестерімізбен монетарлық саясатта үйлестіруді жалғастыруға шарттастық", - деп мәлімдеді. Бұл туралы ол Қазақстан, Ресей, Беларусь президенттерінің Ақордадағы үшжақты кездесуін қорытындылау барысында мәлім болған еді.