Талғат Ешенұлы. «ҚАЗАҚ МЕМЛЕКЕТІНЕ – 550 ЖЫЛ» ЕМЕС
Төтеннен туған нәсте емес, орайы келген ұлы дүбір той. Қазақ Хандығының мерейтойы.
Айтары жоқ, Президенттің «Қазақ хандығының 550-жылдығын мерекелеу туралы» уәлі сөзі бәріміздің көңілімізден шықты. Бірақ, осы маңызды мәселені талқылау кезінде, өзіміз де аңғармай, кереғар ой, пікір қайшылықтарын жіберіп алып жатырмыз.
Екі-үш күннен бері ақпарат құралдарында, әлеуметтік желіде барлығымыз жабылып, мұны «Қазақ мемлекетіне – 550 жыл» деп жарнамалай бастадық. Анығында, «Қазақ мемлекетіне – 550 жыл» емес, «Қазақ хандығына – 550 жыл» болса керек.
Әрине, қазіргі жағдайда Қазақ хандығының 550-жылдығын мағыналы, маңызды іс-әрекетпен атап өтіп алсақ та – үлкен олжа. Бірақ, халқымыз үшін де, келешек жас ұрпақ үшін де, ішкі-сыртқы дос-дұшпан үшін де бұл тойдың «аты-жөнін, мән-мағынасын» жіліктеп, анықтап, ашып берген дұрыс.
Ал, қазақтың жеріндегі өркениеттердің, мемлекеттердің, ұлт-ұлыстардың тарихы, осы бір жазира даладай, мыңдаған жылдардың өне бойына созылып жатыр. Ол өркениеттер мен мемлекеттердің мерейтойын да сәт-сәтімен атап өтерміз.
Сондықтан, сақ болайық. Олай болмаса, мемлекеттігіміздің тарихын «бес-ақ ғасырға сыйғызып жіберіп», тағы да тағдырдың тәлкегіне, тарихтың тұзағына өзіміз барып түсеріміз кәдік