Марс ғаламшарында Төретам пайда болды
АСТАНА. 9 тамыз. BAQ.kz – Марс ғаламшарындағы кратерге Қызылорда облысының Төретам кентінің атауы берілді деп хабарлайды Curiosity және Роскосмостың Марсты зерттеуге арналған тобының жетекшісі Виталий Егоров. Бұл туралы ол "ВКонтакте" әлеуметтік желісінде жариялаған.
Ресейлік Белев және Реутов қалаларымен қатар, енді Төретам (суретте - Авт.) кентінің атауы Марс ғаламшарында аталатын болады. Бұл үш кенттің атауы Марстағы кратерге берілуінің өзіндік себебі бар. Марстағы нысандарға атау беру тәртібі бойынша халқының саны 100 мыңға жетпейтін елді мекендердің атауы берілуі тиіс.
Облыстың Қармақшы ауданындағы Төретам кентінің қазіргі уақытта 7 мың шамасында тұрғыны бар. Демек, Төретам кентінің атауын Марстағы кратерге беруге болады. Сонымен қатар, кент Байқоңыр ғарыш айлағының өте жақын орналасқан. Атау беру кезінде мамандар осы екі себепті ескерген.
Нұрсерік ЖОЛБАРЫС